Leeve Theaterfrünn,
wi wööd woller Theater speelen!
Ditmol hebt wi us een Kriminalkomödie utsöcht.
Dat Stück hett den Tietel: " Een Liek för Grete ", schreben hett dat Hans Schimmel un in dat plattdütsche översett hett dat Wolfgang Binder. Rutbröcht hett dat de Plausus Theaterverlag.
Dat Stück speelt ob dat Krüzfahrtschipp Phönix. Een Seefahrt is jo bekanntlich lustig, un trotzdem kummt dat twischen den Gästen jümmer woller to kappeleien. Dat dat ditmol sogar een Mord gift, un de Liek achterran ok noch verschwinden deit, dormit hett Kapitän Hechter nicht rekent. Wiel dat bit no den nächsten Haven noch wiet is, un ok keen Polizist an Bord is, versöcht de Köchin Grete Glövich den Fall obtoklären. De meent jo, as geübte Krimileserin, kann se den Fall lösen. Dat ehre Kochkünste dorbi tokort kummt, stört ehr nich, den Kapitän un de Gäste ober umsomehr. Un plötzlich hett jeder jeden in Verdacht, wat to noch mehr Obregung föhrt...
Wat dor noch so allens passeert, dat köönt ji jau woller im Frelsdorper Heimathus ankieken!
Text: De Frelsdorper Theaterlüüd
